منتديات سكون القمر - أرجع لحضن وسادتـي كالعـاده!!

يا اللي لمحتوا دمعتـي بجفونـي
مستغربين اللي حصـل ياسـاده!!

تكفون لفـراق الغضـي خلونـي
أشكي همومي محتضن لي وساده

ماعاد أبيكـم تنشـدون شلونـي
جرحي وعارف علتـه وضمـاده

إن كان بيديكـم سنـع شوفونـي
وإلا اتركونـي للحـزن واجهـاده

من يوم غابت عن سماي وكونـي
مولاة قلبـي.. غايتـه.. ومـراده

أم العيون السود / كـل جنونـي
ست البنات البيض.. وأحلى غاده

كني عن أبواب الفـرح صدّونـي
وإلا الصبر.. كثر الرجا مافـاده!

الجرح جرحي .. والطعون طعونـي
للحب ناس ... وللهــوى زهاده

لابو قصيد ٍ يرتضي لـي هونـي
يشكي من الحظ الردي وعنـاده!

قولوا لها شاللي حصـل؟ دلّونـي
(أبطت) .. وخابر مالهـا بالعـاده

بعض البشـر غابـوا ولاهمونـي
والبعض يمكـن خيرتـي فابعـاده

بس المصيبه لو تصيـب ظنونـي
بغيـاب نـور وطلّـة المـيّـاده

قولوا لها والشـوق زاد شجونـي
وينك؟؟ تراني مـا أطيـق زيـاده

يا أم الغلا كلـه ونـور عيونـي
ياروووح عبدالله ونبـض فـؤاده

شوفي غيابـك يستثيـر سكونـي
والليل عينـي ماهتنـت برقـاده

ضاقت نواحي خافقـي وركونـي
من روحتك فجـأه بـدون افـاده

دفتر قصيديْ إشتاقلك من دونـي
صفحاتـه لرقـة يـدك معـتـاده

وجدي عليـك اليـوم يامظنونـي
وجـد العراقـي لا بكـى بغـداده

أقسم بـرب البيـت واتعرفونـي
وأبيـات شعـري تنتظـر هـدّاده

إن كـان عـادت والله لْتلقونـي
أقصد وألبّسهـاْ القصيـد قـلاده

والحين أبي علم ٍ يكـفّ ظنونـي
منهو يجيب أخبارهـا ياسـاده؟؟

أما كـذا .. وإلا ابعـدوا خلونـي
أرجع لحضن وسادتـي كالعـاده!!