فديت عيونك



فديت عيونك لو غدت روح مغليك
وش عاد لو راحت لعينك عشايـــر

ابيع ما يغلى على الكون و اشريك
و اسوق لَى جتني علومك بشايــــر

و ازعّل جميع الناس بالحيل و ارضيك
و اصبر ولو دارت علَيّ الدّوايـــر

و آخذ من ايّامي لك ايام واعطيك
وان راح عمري لك فلا هو خسايــــــر

احب انا شوفك و صوتك و طاريك
دايم وفكري فيك هايم وحايــــــر

بالصمت اهوجس بك و بالصوت اناديك
و الله عليم البيّنـــه و السّرايــر

انا و قلبي و الهوى بين اياديك
عندك مفاتيح الهنا للضمـايـــر

من روحي احبك ومن روحي افديك
يامن غرامـــه و الحسن فيه ثايـــر


للشاعــر المبــــــدع خالـــــد الفيصـــل