لو البحر ياخذ هموم المخاليق
نثرت همي فوق شاطيه كله
ياكثر ما سليت نفسي عن الضيق
اثره معي مثل المباري لظله
تمشي بي الدنيا علي غير مااطيق
كن السعاده درب ماصرت ادله
واحيان تصفقني مع الوقت تصفيق
واعيش في صدمة حياةٍ ممله
شرعت بيبان الوفا للمواثيق
ولقيت بيبان الغدر مسفهله
وانا لو اني للغدر ناشف الريق
اموت حلقي بالردى ماأبله
صحيح شي يشقق القلب تشقيق
لا شلت هم وصاحبه مافطن له
صديق لكنه قليل توافيق
ذيبن وخاوا له مع الدرب عله
اشعلت له شمعة وفا بالمعاليق
واقفيت عنه وخاطري فيه غله
مايدري ان جبال نفسي شواهيق
ومعانقة صدر السحاب بمحله
تقراني حروف القصايد طواريق
ونفسي تحاسبني على كل زله