رسالة الى الطرف الآخر

هاي مو رساله مثل كل مره
هاي قصص بيهم شوي حكم


اكو بنت انخطبت لمدة سنتين بالضبط و چان باقي فترة 3 إيام ل عرسها و فجأة بدون أي مقدمات قررت إن هي ما راح تكمل و گلت لـ أهلها أني مااريدة... كل الي حواليها سألوها عن السبب و ما رضت تحچي لأحد لحتى بالآخير اعترفت و گالت ما_أنطاني_أي_شي_بوقتة

_ يطمن علية بعد ما يخلص اليوم ..
_ما يسأل عن امتحاني الصعب اللي مرعوبة منة و گايلتلة عنة بعد أسبوع ..
_هدية عيد ميلادي حتى تجي متأخرة ..
كلشي منة كنت اشوفة بارد و فاتر و ما إلة أي طعم ..

هسه نجي لوحدة ثانية متزوجة و مرة صارت مشكلة بينها و بين زوجها وصلت المشكلة بيناتهم ع إنهم ضلو مزاعلين بعض أربعة إيام كاملين طبعاً همه متزوجين بـ محافظة ثانية بعيدة عن أهلها
و بأيام الزعل قررت تنزل تشتري شوية أغراض إلها و هي ابالها انها حافظة شوارع المدينة زين .. نزلت اشترت و فرفرت هواية و المفروض ترجع ع بيتها بس ما عرفت هي وين و صارت تباوع حواليها ما تعرف أي محل و لا اكو شي مألوف عليها أو عنوان تعرفه تروحلة ..
هي حتى متعرف ترجع لـ ورا ولا تقرب لكدام
و كل ما تحركت من مكانها تضيع اكثر صارت تبچي و اتصلت بـ زوجها..
گلتله أني ضايعه و ماادري اني وين ولا اعرف شسوي
و طبعاً هذا كله ويا صوت مليان دموع ..
رد عليها و گللها اهدي أني وياچ ... أني يمچ ... اسألي أي صاحب محل عندچ و اعرفي منه شنو اسمه واجي اخذچ ... اطمني أني وياچ و ما راح اعوفچ... جايچ
و بعد ما فر الدنيا ... شافها و ركض الها و هي من الخوف ما چانت مصدگة إنه هو و بعد ما استوعبت صارت تبچي و ضمت نفسها ورا ضهره ..
مرت فترة طويلة ع هالقصة وهي ما نستلهيا ..
تگول إنو كل ما شياطيني يوسوسلي حتى أنكد عليه گلبي ماينطيني ..
و تجي ابالي صورة الوقت الي چنت بحاجة أمان وچان هو أماني و حمايتي
اكو ثقافه اسمها #ثقافة_وقت ...
شي معين احنه بحاجته بهذا الوقت إذا تتأخر لحظة وحدة عن هالوقت احنه ما نرجع بحاجته ..
كل شي اله وقتة (( الإحساس .. الكلمة .. المعايدة .. الطبطبة ... والحضن ... النظرة ... الخ ))
العصير البارد إذا احتر ما بقى اله طعمة ..
و الدوا الي يجي بعد وگته ما بقى يفيد ..

كل شغلة وإلها وقتها و اذا طلعت عن وقتها تفقد قيمتها و الله